ਸਿਮਰਜੀਤ ਸਿੰਘ ਐਡਵੋਕੇਟ ਪੰਜਾਬ ਹਰਿਆਣਾ ਹਾਈਕੋਰਟ ਨਾਲ ਹੋਈ ਜਿਆਦਤੀ ਕੇਵਲ ਸਿੱਖੀ ਸਰੂਪ ਵਿਰੁੱਧ ਨਫਰਤ ਦੀ ਭਾਵਨਾ, ਉੱਚ ਪੱਧਰੀ ਜਾਂਚ ਹੋਵੇ : ਮਾਨ
ਫ਼ਤਹਿਗੜ੍ਹ ਸਾਹਿਬ, 22 ਸਤੰਬਰ ( ) “ਬੀਤੇ ਕੁਝ ਦਿਨ ਪਹਿਲੇ ਪੰਜਾਬ ਹਰਿਆਣਾ ਹਾਈਕੋਰਟ ਦੇ ਨਿਹੰਗ ਬਾਣੇ ਵਿਚ ਸਜੇ ਗੁਰਸਿੱਖ ਵਕੀਲ ਸ. ਸਿਮਰਜੀਤ ਸਿੰਘ ਨਾਲ 25-30 ਵਕੀਲਾਂ ਵੱਲੋ ਇਕੱਠੇ ਹੋ ਕੇ ਕੁੱਟਮਾਰ ਕਰਨ ਉਸਦੇ ਸਿੱਖੀ ਚਿੰਨ੍ਹ ਦੁਮਾਲਾ ਉਤਾਰਨ ਦੀ ਹੋਈ ਅਤਿ ਹਿਰਦੇਵੇਦਕ ਕਾਰਵਾਈ ਅਤਿ ਸ਼ਰਮਨਾਕ ਅਤੇ ਸਿੱਖ ਵਿਰੋਧੀ ਨਫਰਤ ਦੀ ਭਾਵਨਾ ਨਾਲ ਹੋਏ ਅਮਲਾਂ ਦੀ ਸਖਤ ਸ਼ਬਦਾਂ ਵਿਚ ਨਿੰਦਾ ਕਰਦੇ ਹੋਏ ਇਸ ਵਾਪਰੇ ਦੁਖਾਂਤ ਦੀ ਉੱਚ ਪੱਧਰੀ ਜਾਂਚ ਕਰਵਾਉਣ ਅਤੇ ਜਿਨ੍ਹਾਂ ਨੇ ਨਿਹੰਗ ਸਿੰਘ ਦੇ ਸਿੱਖੀ ਬਾਣੇ ਦੀ ਤੋਹੀਨ ਕੀਤੀ ਹੈ ਅਤੇ ਝੂਠੀ ਐਫ.ਆਈ.ਆਰ ਦਰਜ ਕਰਵਾਕੇ ਉਸਦੇ ਸਿੱਖੀ ਸਰੂਪ ਨੂੰ ਨਿਸ਼ਾਨਾਂ ਬਣਾਇਆ ਹੈ ਉਨ੍ਹਾਂ ਦੀ ਨਿਰਪੱਖਤਾ ਨਾਲ ਜਾਂਚ ਕਰਵਾਈ ਜਾਵੇ ਅਤੇ ਕਾਨੂੰਨੀ ਅਮਲ ਕੀਤਾ ਜਾਵੇ ।”
ਇਹ ਵਿਚਾਰ ਸ. ਸਿਮਰਨਜੀਤ ਸਿੰਘ ਮਾਨ ਪ੍ਰਧਾਨ ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਨੇ ਬੀਤੇ ਕੁਝ ਦਿਨ ਪਹਿਲੇ ਪੰਜਾਬ ਹਰਿਆਣਾ ਹਾਈਕੋਰਟ ਦੇ ਨਿਹੰਗ ਸਿੰਘ ਬਾਣੇ ਵਿਚ ਵਕੀਲ ਨਾਲ ਹੋਈ ਜਿਆਦਤੀ ਨੂੰ ਅਸਹਿ ਕਰਾਰ ਦਿੰਦੇ ਹੋਏ ਅਤੇ ਇਸਦੀ ਨਿਰਪੱਖਤਾ ਨਾਲ ਜਾਂਚ ਕਰਵਾਕੇ ਅਗਲੇਰੀ ਕਾਰਵਾਈ ਕਰਨ ਦੀ ਗੱਲ ਕਰਦੇ ਹੋਏ ਪ੍ਰਗਟ ਕੀਤੇ। ਉਨ੍ਹਾਂ ਇਸ ਗੱਲ ਤੇ ਵੀ ਗਹਿਰਾ ਦੁੱਖ ਪ੍ਰਗਟ ਕੀਤਾ ਕਿ ਇਨ੍ਹਾਂ ਹਮਲਾ ਕਰਨ ਵਾਲੇ ਵਕੀਲਾਂ ਵਿਚ ਕੁਝ ਗੁੰਮਰਾਹ ਹੋਏ ਸਿੱਖ ਵਕੀਲਾਂ ਨੇ ਵੀ ਇਹ ਬਜਰ ਗੁਸਤਾਖੀ ਕੀਤੀ । ਜਦੋਕਿ ਉਨ੍ਹਾਂ ਨੂੰ ਗੁਰਸਿੱਖੀ ਮਰਿਯਾਦਾ ਦੀ ਪੂਰੀ ਜਾਣਕਾਰੀ ਸੀ ਅਤੇ ਸਜਾਏ ਗਏ ਦੁਮਾਲੇ ਤੇ ਚੱਕਰ ਦੇ ਮਹੱਤਵ ਦਾ ਪਤਾ ਸੀ । ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੂੰ ਚਾਹੀਦਾ ਸੀ ਕਿ ਜੇਕਰ ਕੋਈ ਅਣਹੋਣੀ ਗੱਲ ਹੋਈ ਹੈ, ਤਾਂ ਉਸਦੀ ਤਫਸੀਲ ਨਾਲ ਜਾਂਚ ਕਰਨ ਲਈ ਬਾਰ ਐਸੋਸੀਏਸਨ ਤੇ ਹਾਈਕੋਰਟ ਦੇ ਵਕੀਲਾਂ ਦੀ ਜਿੰਮੇਵਾਰੀ ਲਗਾਈ ਜਾਂਦੀ ਅਤੇ ਫਿਰ ਹੀ ਉਸ ਵਿਰੁੱਧ ਕੋਈ ਜੇਕਰ ਦੋਸ ਸਾਬਤ ਹੁੰਦਾ ਫਿਰ ਅਮਲ ਕੀਤਾ ਜਾਂਦਾ । ਪਰ ਬਿਨ੍ਹਾਂ ਕਿਸੇ ਜਾਂਚ ਤੋ ਉਸ ਵਿਰੁੱਧ ਐਫ.ਆਈ.ਆਰ ਦਰਜ ਕਰਵਾ ਦੇਣ ਤੇ ਬਾਰ ਐਸੋਸੀਏਸਨ ਵੱਲੋ ਉਸ ਸਿੱਖ ਵਕੀਲ ਦੀ ਵਕਾਲਤ ਦਾ ਲਾਈਸੈਸ ਰੱਦ ਕਰਵਾਉਣਾ ਪ੍ਰਤੱਖ ਕਰਦਾ ਹੈ ਕਿ ਇਹ ਨਫਰਤ ਦੀ ਭਾਵਨਾ ਦੀ ਬਦੌਲਤ ਕੀਤਾ ਗਿਆ ਹੈ । ਜਿਨ੍ਹਾਂ ਵਕੀਲਾਂ ਨੇ ਨਫਰਤ ਦੀ ਭਾਵਨਾ ਨਾਲ ਅਜਿਹਾ ਅਮਲ ਕੀਤਾ ਅਸਲੀਅਤ ਵਿਚ ਆਤਮਿਕ ਤੌਰ ਤੇ ਉਹ ਦੋਸ਼ੀ ਹਨ । ਜਿਨ੍ਹਾਂ ਨੇ ਹਜੂਮ ਬਣਕੇ ਕਹਾਣੀ ਇਥੋ ਤੱਕ ਪਹੁੰਚਾ ਦਿੱਤੀ ਕਿ ਇਕ ਗੁਰਸਿੱਖ ਵਕੀਲ ਦੇ ਵਕਾਲਤ ਦੇ ਲਾਈਸੈਸ ਨੂੰ ਰੱਦ ਕਰਵਾਉਣ ਵਿਚ ਮੋਹਰੀ ਬਣੇ । ਉਨ੍ਹਾਂ ਉਮੀਦ ਪ੍ਰਗਟ ਕੀਤੀ ਕਿ ਬਾਰ ਐਸੋਸੀਏਸਨ ਪੰਜਾਬ ਹਰਿਆਣਾ ਹਾਈਕੋਰਟ ਉਸ ਨਿਹੰਗ ਸਿੰਘ ਵਕੀਲ ਦੇ ਰੱਦ ਕੀਤੇ ਲਾਈਸੈਸ ਦੇ ਦੁੱਖਦਾਇਕ ਅਮਲ ਤੇ ਗੌਰ ਕਰਕੇ ਇਸ ਮਸਲੇ ਨੂੰ ਸੂਝਵਾਨਤਾ ਨਾਲ ਸੁਲਝਾਅ ਵੀ ਲਵੇਗੀ ਅਤੇ ਇਸ ਦੁਖਾਂਤ ਦੀ ਨਿਰਪੱਖਤਾ ਨਾਲ ਜਾਂਚ ਕਰਵਾਕੇ ਅਗਲੇਰੀ ਕਾਨੂੰਨੀ ਕਾਰਵਾਈ ਅਮਲ ਵਿਚ ਲਿਆਵੇਗੀ ।