ਦਾ ਟ੍ਰਿਬਿਊਨ ਅਦਾਰਾ ਸਿੱਖਾਂ ਨੂੰ ਨਿਸ਼ਾਨਾਂ ਬਣਾਕੇ ਸਿੱਖ ਕੌਮ ਵਿਰੁੱਧ ਗੁੰਮਰਾਹਕੁੰਨ ਪ੍ਰਚਾਰ ਕਰਨ ਤੋਂ ਬਾਜ ਕਿਉਂ ਨਹੀਂ ਆ ਰਿਹਾ ? : ਮਾਨ
ਫ਼ਤਹਿਗੜ੍ਹ ਸਾਹਿਬ, 26 ਜੂਨ ( ) “ਇਹ ਬਹੁਤ ਹੀ ਦੁੱਖ ਅਤੇ ਅਫ਼ਸੋਸ ਵਾਲੇ ਦਾ ਟ੍ਰਿਬਿਊਨ ਅਦਾਰੇ ਦੇ ਅਮਲ ਹਨ ਕਿ ਉਹ ਅਕਸਰ ਹੀ ਸਿੱਖ ਸਖਸ਼ੀਅਤਾਂ ਅਤੇ ਸਿੱਖ ਕੌਮ ਨੂੰ ਨਿਸ਼ਾਨਾਂ ਬਣਾਕੇ ਉਨ੍ਹਾਂ ਵਿਰੁੱਧ ਗੁੰਮਰਾਹਕੁੰਨ ਪ੍ਰਚਾਰ ਕਰਨ ਤੋਂ ਬਿਲਕੁਲ ਵੀ ਮੌਕਾ ਹੱਥੋ ਨਹੀ ਗਵਾਉਦਾ । ਜਦੋਕਿ ਇਹ ਸਭ ਨੂੰ ਜਾਣਕਾਰੀ ਹੈ ਕਿ ਇਸ ਮੁਲਕ ਨੂੰ ਆਜਾਦ ਕਰਵਾਉਣ ਅਤੇ ਇਸਦੀ ਸਰਹੱਦਾਂ ਉਤੇ ਆਪਣੀਆ ਅਹੁੱਤੀਆ ਤੇ ਕੁਰਬਾਨੀਆ ਦੇ ਕੇ ਰੱਖਿਆ ਕਰਨ ਅਤੇ ਹਰ ਖੇਤਰ ਵਿਚ ਮੋਹਰੀ ਬਣਕੇ ਯੋਗਦਾਨ ਪਾਉਣ ਵਾਲੀ ਸਿੱਖ ਕੌਮ ਹੀ ਹੈ । ਫਿਰ ਵੀ ਫਿਰਕੂ ਸੋਚ ਅਧੀਨ ਇਹ ਅਦਾਰਾ ਸਿੱਖਾਂ ਨੂੰ ਨਿਸ਼ਾਨਾਂ ਬਣਾਉਣ ਤੋਂ ਬਿਲਕੁਲ ਗੁਰੇਜ ਨਹੀ ਕਰਦਾ । ਜੋ ਸਿੱਖ ਮਨਾਂ ਨੂੰ ਡੂੰਘੀ ਠੇਸ ਪਹੁੰਚਾਉਣ ਅਤੇ ਉਨ੍ਹਾਂ ਵਿਰੁੱਧ ਨਫਰਤ ਪੈਦਾ ਕਰਨ ਵਾਲੇ ਦੁੱਖਦਾਇਕ ਨਿੰਦਣਯੋਗ ਅਮਲ ਹਨ । ਜਿਸ ਨੂੰ ਸਿੱਖ ਕੌਮ ਕਤਈ ਸਹਿਣ ਨਹੀ ਕਰ ਸਕਦੀ ।”
ਇਹ ਵਿਚਾਰ ਸ. ਸਿਮਰਨਜੀਤ ਸਿੰਘ ਮਾਨ ਪ੍ਰਧਾਨ ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਨੇ 25 ਜੂਨ ਦੇ ਦਾ ਟ੍ਰਿਬਿਊਨ ਦੇ ਪੰਨਾ ਨੰਬਰ 11 ਉਤੇ Sarabjeet’s new Mahindra XUV ਦੇ ਸਿਰਲੇਖ ਹੇਠ ਪ੍ਰਕਾਸਿਤ ਕੀਤੀ ਗਈ ਸਿੱਖ ਵਿਰੋਧੀ ਉਹ ਖਬਰ ਜੋ ਹੁਣੇ ਹੀ ਫਰੀਦਕੋਟ ਲੋਕ ਸਭਾ ਹਲਕੇ ਤੋ ਜਿੱਤਕੇ ਐਮ.ਪੀ ਬਣੇ ਸ. ਸਰਬਜੀਤ ਸਿੰਘ ਸੰਬੰਧੀ ਜਨਤਾ ਵਿਚ ਸੰਕੇ ਖੜ੍ਹੇ ਕਰਨ ਅਤੇ ਗੁੰਮਰਾਹਕੁੰਨ ਪ੍ਰਚਾਰ ਕਰਨ ਦੀ ਮੰਦਭਾਵਨਾ ਅਧੀਨ ਲਗਵਾਈ ਹੈ, ਦੀ ਪੁਰਜੋਰ ਸ਼ਬਦਾਂ ਵਿਚ ਨਿਖੇਧੀ ਕਰਦੇ ਹੋਏ ਅਤੇ ਦਾ ਟ੍ਰਿਬਿਊਨ ਅਦਾਰੇ ਨੂੰ ਆਪਣੀ ਇਸ ਸ਼ਰਾਰਤ ਭਰੀ ਸੋਚ ਅਤੇ ਅਮਲਾਂ ਦਾ ਅੰਤ ਕਰਨ ਦੀ ਸੰਜ਼ੀਦਗੀ ਭਰੀ ਰਾਏ ਦਿੰਦੇ ਹੋਏ ਪ੍ਰਗਟ ਕੀਤੇ । ਉਨ੍ਹਾਂ ਕਿਹਾ ਕਿ ਜਿਸ ਦੇ ਪਿਤਾ ਪੁਲਿਸ ਵਿਚ ਇੰਸਪੈਕਟਰ ਸਨ ਅਤੇ ਜਿਨ੍ਹਾਂ ਦੀ ਮਾਤਾ ਸਿਹਤ ਵਿਭਾਗ ਵਿਚ ਚੰਗੇ ਅਹੁਦੇ ਤੇ ਸੇਵਾ ਕਰਦੇ ਰਹੇ ਹਨ, ਜੇਕਰ ਉਨ੍ਹਾਂ ਦੀ ਸ਼ਹਾਦਤ ਮਗਰੋ ਉਨ੍ਹਾਂ ਦੇ ਪੁੱਤਰ ਸ. ਸਰਬਜੀਤ ਸਿੰਘ ਜੋ ਬਹੁਤ ਹੀ ਔਖੇ ਤੇ ਗਰੀਬੀ ਦੇ ਸਮੇ ਵਿਚੋ ਗੁਜਰਦੇ ਰਹੇ ਹਨ, ਜਿਨ੍ਹਾਂ ਨੂੰ ਐਮ.ਪੀ ਚੋਣ ਸਮੇ ਪੰਜਾਬੀਆਂ ਤੇ ਸਿੱਖ ਸੰਗਤਾਂ ਨੇ ਆਪਣੀਆ ਆਮਦਨਾਂ ਵਿਚੋ ਦਸਵੰਧ ਕੱਢਕੇ ਚੋਣ ਜਿਤਾਈ ਅਤੇ ਗੁਰਸਿੱਖਾਂ ਨੇ ਉਨ੍ਹਾਂ ਨੂੰ ਤੁਰਨ-ਫਿਰਨ ਲਈ ਮਹਿੰਦਰਾ ਐਕਸ.ਯੂ.ਵੀ ਗੱਡੀ ਭੇਟ ਕੀਤੀ ਤਾਂ ਇਨ੍ਹਾਂ ਫਿਰਕੂ ਐਡੀਟਰਾਂ ਤੇ ਪੱਤਰਕਾਰਾਂ ਦੇ ਢਿੱਡ ਵਿਚ ਪੀੜ੍ਹ ਕਿਉ ਸੁਰੂ ਹੋ ਗਈ ਹੈ ? ਉਨ੍ਹਾਂ ਸਵਾਲ ਕਰਦੇ ਹੋਏ ਕਿਹਾ ਕਿ ਸ. ਸਰਬਜੀਤ ਸਿੰਘ ਨੂੰ ਬਤੌਰ ਇਕ ਸਿੱਖ ਹੋਣ ਦੇ ਨਾਤੇ ਦਾ ਟ੍ਰਿਬਿਊਨ ਅਦਾਰੇ ਨੇ ਤਾਂ ਨਿਸ਼ਾਨਾਂ ਬਣਾ ਲਿਆ ਹੈ, ਲੇਕਿਨ ਜੋ ਇਨਸਾਨ ਚਾਹ ਵੇਚਦਾ ਹੁੰਦਾ ਸੀ ਅਤੇ ਜੋ ਅੱਜ ਇੰਡੀਆ ਦੇ ਵਜੀਰ ਏ ਆਜਮ ਹਨ, ਜਿਨ੍ਹਾਂ ਕੋਲ ਅਨੇਕਾ ਗੱਡੀਆਂ ਅਤੇ ਹੋਰ ਜਾਇਦਾਦਾਂ ਬਣੀਆ ਹਨ ਅਤੇ ਜਿਨ੍ਹਾਂ ਨੇ ਆਪਣੀ ਪਤਨੀ ਦੀ ਵੀ ਅੱਜ ਤੱਕ ਸਾਰ ਨਹੀ ਲਈ ਕਿ ਉਹ ਅੱਜ ਕਿਹੜੇ ਹਾਲਾਤਾਂ ਵਿਚ ਕਿਵੇ ਗੁਜਰ ਰਹੇ ਹਨ, ਉਨ੍ਹਾਂ ਨੂੰ ਤਾਂ ਇਸ ਮੁਤੱਸਵੀ ਅਤੇ ਫਿਰਕੂ ਪ੍ਰੈਸ ਨੇ ਕਦੇ ਨਿਸ਼ਾਨਾਂ ਨਹੀ ਬਣਾਇਆ ਅਤੇ ਉਨ੍ਹਾਂ ਦੀਆਂ ਜਾਇਦਾਦਾਂ ਤੇ ਗੱਡੀਆਂ ਬਾਰੇ ਕਦੀ ਗੱਲ ਨਹੀ ਕੀਤੀ । ਫਿਰ ਜੋ ਵਿਧਾਨ ਇਥੋ ਦੇ ਸਭ ਕੌਮਾਂ, ਧਰਮਾਂ, ਕਬੀਲਿਆ ਨੂੰ ਬਰਾਬਰਤਾ ਦੇ ਹੱਕ ਤੇ ਅਧਿਕਾਰ ਪ੍ਰਦਾਨ ਕਰਦਾ ਹੈ, ਉਸਦਾ ਉਲੰਘਣ ਕਰਕੇ ਅਜਿਹੇ ਐਡੀਟਰ ਤੇ ਪੱਤਰਕਾਰ ਮੰਦਭਾਵਨਾ ਭਰੀ ਸੋਚ ਅਧੀਨ ਕਿਸ ਦਲੀਲ ਨਾਲ ‘ਸਰਬੱਤ ਦਾ ਭਲਾ’ ਲੋੜਨ ਵਾਲੀ ਸਿੱਖ ਕੌਮ ਅਤੇ ਸਿੱਖ ਸਖਸ਼ੀਅਤਾਂ ਨੂੰ ਨਿਸ਼ਾਨਾਂ ਬਣਾਕੇ ਗੁੰਮਰਾਹਕੁੰਨ ਪ੍ਰਚਾਰ ਕਰ ਰਹੇ ਹਨ ।