ਸ. ਸਰਬਜੀਤ ਸਿੰਘ ਪ੍ਰਧਾਨ ਯੂਕੇ ਸਟੇਟ ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਨੂੰ ਦਿੱਲੀ ਹਵਾਈ ਅੱਡੇ ਪਹੁੰਚਣ ‘ਤੇ ਐਨ.ਆਈ.ਏ. ਵੱਲੋ ਪ੍ਰੇਸ਼ਾਨ ਤੇ ਗ੍ਰਿਫਤਾਰ ਕਰਨ ਦੀ ਕਾਰਵਾਈ ਅਸਹਿ : ਮਾਨ
ਫ਼ਤਹਿਗੜ੍ਹ ਸਾਹਿਬ, 19 ਸਤੰਬਰ ( ) “ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਦੀ ਸਿੱਖ ਕੌਮ ਦੀ ਨੁਮਾਇੰਦਗੀ ਕਰਨ ਵਾਲੀ ਜਥੇਬੰਦੀ ਬੇਸ਼ੱਕ ਆਪਣੀ ਆਜਾਦ ਬਾਦਸਾਹੀ ਸਿੱਖ ਸਟੇਟ (ਖ਼ਾਲਿਸਤਾਨ) ਨੂੰ ਕਾਇਮ ਕਰਨ ਲਈ ਜੱਦੋ-ਜ਼ਹਿਦ ਕਰਦੀ ਆ ਰਹੀ ਹੈ । ਪਰ ਇਸ ਪ੍ਰਕਿਰਿਆ ਨੂੰ ਕਰਦੇ ਹੋਏ ਅਸੀ ਜ਼ਮਹੂਰੀਅਤ ਕਦਰਾਂ-ਕੀਮਤਾਂ ਉਤੇ ਪਹਿਰਾ ਦਿੰਦੇ ਹੋਏ ਅਮਨਮਈ ਢੰਗਾਂ ਰਾਹੀ ਕੌਮਾਂਤਰੀ ਕਾਨੂੰਨਾਂ, ਨਿਯਮਾਂ ਅਧੀਨ ਸੰਘਰਸ਼ ਕਰਦੇ ਆ ਰਹੇ ਹਾਂ । ਪਰ ਇਸਦੇ ਬਾਵਜੂਦ ਵੀ ਇੰਡੀਆ ਦੇ ਮੁਤੱਸਵੀ ਸਿੱਖ ਵਿਰੋਧੀ ਹੁਕਮਰਾਨ ਸਿੱਖ ਕੌਮ ਦੀ ਆਜਾਦੀ ਦੇ ਮਿਸਨ ਵਿਚ ਯੋਗਦਾਨ ਪਾਉਣ ਵਾਲੇ ਸਿਰਕੱਢ ਬਾਹਰਲੇ ਮੁਲਕਾਂ ਵਿਚ ਰਹਿਣ ਵਾਲੇ ਸਿੱਖਾਂ ਅਤੇ ਇੰਡੀਆ ਵਿਚ ਵੱਸਣ ਵਾਲੇ ਸਿੱਖਾਂ ਨੂੰ ਆਨੇ-ਬਹਾਨੇ ਬਿਨ੍ਹਾਂ ਕਿਸੇ ਵਜਹ ਦੇ ਆਪਣੇ ਕਾਨੂੰਨਾਂ ਅਤੇ ਫੋਰਸਾਂ ਦੀ ਦੁਰਵਰਤੋ ਕਰਦੇ ਹੋਏ ਕੇਵਲ ਤੰਗ-ਪ੍ਰੇਸ਼ਾਨ ਹੀ ਨਹੀ ਕਰਦੇ, ਬਲਕਿ ਅਜਿਹੇ ਸਿੱਖਾਂ ਨੂੰ ਇਹ ਹੁਕਮਰਾਨ ਜ਼ਲੀਲ ਕਰਨ ਦਾ ਕੋਈ ਮੌਕਾ ਨਹੀ ਜਾਣ ਦਿੰਦੇ । ਜੋ ਜਮਹੂਰੀਅਤ ਕਦਰਾਂ-ਕੀਮਤਾਂ ਅਤੇ ਮਨੁੱਖੀ ਅਧਿਕਾਰਾਂ ਦਾ ਘੋਰ ਉਲੰਘਣ ਕਰਨ ਦੇ ਤੁੱਲ ਅਤਿ ਨਿੰਦਣਯੋਗ ਕਾਰਵਾਈਆ ਹਨ । ਜਿਨ੍ਹਾਂ ਨੂੰ ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਕਤਈ ਬਰਦਾਸਤ ਨਹੀ ਕਰ ਸਕਦਾ।”
ਇਹ ਵਿਚਾਰ ਸ. ਸਿਮਰਨਜੀਤ ਸਿੰਘ ਮਾਨ ਐਮ.ਪੀ ਅਤੇ ਪ੍ਰਧਾਨ ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਨੇ ਯੂਕੇ ਪਾਰਟੀ ਦੇ ਪ੍ਰਧਾਨ ਸ. ਸਰਬਜੀਤ ਸਿੰਘ ਦੇ ਦਿੱਲੀ ਹਵਾਈ ਅੱਡੇ ਤੇ ਪਹੁੰਚਣ ਸਮੇ ਇੰਡੀਅਨ ਏਜੰਸੀਆ, ਵਿਸ਼ੇਸ਼ ਤੌਰ ਤੇ ਐਨ.ਆਈ.ਏ. ਦੀ ਏਜੰਸੀ ਵੱਲੋ ਉਨ੍ਹਾਂ ਨੂੰ ਕਈ ਘੰਟੇ ਤੰਗ ਪ੍ਰੇਸਾਨ ਕਰਨ ਅਤੇ ਫਿਰ ਆਪਣੇ ਨਾਲ ਜ਼ਬਰੀ ਲੈ ਜਾਣ ਦੇ ਵਿਧਾਨ ਵਿਰੋਧੀ ਅਤੇ ਮਨੁੱਖੀ ਅਧਿਕਾਰਾਂ ਵਿਰੋਧੀ ਕਾਰਵਾਈਆ ਦੀ ਸਖਤ ਸ਼ਬਦਾਂ ਵਿਚ ਨਿੰਦਾ ਕਰਦੇ ਹੋਏ ਅਤੇ ਇੰਡੀਅਨ ਹੁਕਮਰਾਨਾਂ ਤੇ ਏਜੰਸੀਆ ਨੂੰ ਅਜਿਹੇ ਜਲਾਲਤ ਭਰੇ ਅਮਲਾਂ ਦੇ ਨਿਕਲਣ ਵਾਲੇ ਮਾਰੂ ਨਤੀਜਿਆ ਤੋ ਖਬਰਦਾਰ ਕਰਦੇ ਹੋਏ ਪ੍ਰਗਟ ਕੀਤੇ । ਉਨ੍ਹਾਂ ਕਿਹਾ ਕਿ ਸਿੱਖ ਕੌਮ ਦਾ ਕੇਵਲ ਇੰਡੀਆ ਦੀ ਆਜਾਦੀ ਦੇ ਸੰਘਰਸ ਵਿਚ ਹੀ ਵੱਡਾ ਯੋਗਦਾਨ ਹੀ ਨਹੀ ਬਲਕਿ ਇੰਡੀਆ ਨੂੰ ਹਰ ਖੇਤਰ ਵਿਚ ਪ੍ਰਗਤੀ ਵੱਲ ਲਿਜਾਣ, ਮੁਲਕ ਦੀਆਂ ਸਰਹੱਦਾਂ ਤੇ ਰਾਖੀ ਕਰਨ ਅਤੇ ਮੁਲਕ ਦਾ ਢਿੱਡ ਭਰਨ ਅਤੇ ਹੋਰ ਜੋਖਮ ਭਰੇ ਉੱਦਮਾਂ ਵਿਚ ਮੋਹਰੀ ਰਹਿਣ ਕਰਕੇ ਬਹੁਤ ਨਿੱਘਾ ਯੋਗਦਾਨ ਹੈ । ਬਹੁਗਿਣਤੀ ਹੁਕਮਰਾਨਾਂ ਦੀ ਬਜਾਇ ਸਿੱਖ ਕੌਮ ਦਾ ਇਸ ਪਵਿੱਤਰ ਧਰਤੀ ਤੇ ਉਨ੍ਹਾਂ ਦਾ ਕਿਤੇ ਜਿਆਦਾ ਹੱਕ ਹੈ । ਇਸ ਲਈ ਬਾਹਰੋ ਆਉਣ ਵਾਲੇ ਸਿੱਖਾਂ ਅਤੇ ਇਥੇ ਵੱਸਣ ਵਾਲੇ ਸਿੱਖਾਂ ਨਾਲ ਹੁਕਮਰਾਨਾਂ ਅਤੇ ਖੂਫੀਆ ਏਜੰਸੀਆ ਵੱਲੋ ਇਸ ਤਰ੍ਹਾਂ ਮੰਦਭਾਵਨਾ ਅਧੀਨ ਨਿਸ਼ਾਨਾਂ ਬਣਾਕੇ ਜਲੀਲ ਕਰਨ ਅਤੇ ਕਈ-ਕਈ ਘੰਟੇ ਪੁੱਛਤਾਛ ਕਰਦੇ ਹੋਏ ਗੈਰ ਕਾਨੂੰਨੀ ਢੰਗ ਨਾਲ ਗ੍ਰਿਫਤਾਰੀਆ ਕਰਨ ਦੀ ਨਾ ਤਾਂ ਇੰਡੀਅਨ ਵਿਧਾਨ ਇਜਾਜਤ ਦਿੰਦਾ ਹੈ ਅਤੇ ਨਾ ਹੀ ਕੋਈ ਕੌਮਾਂਤਰੀ ਕਾਨੂੰਨ ਤੇ ਨਿਯਮ । ਇਸ ਲਈ ਅਸੀ ਇੰਡੀਆ ਸਰਕਾਰ ਦੀ ਅਤੇ ਐਨ.ਆਈ.ਏ ਦੀ ਸ. ਸਰਬਜੀਤ ਸਿੰਘ ਨੂੰ ਗ੍ਰਿਫਤਾਰ ਕਰਕੇ ਲਿਜਾਣ ਅਤੇ ਉਨ੍ਹਾਂ ਦੀ ਵੱਡੇਰੀ ਉਮਰ ਵਿਚ ਮਾਨਸਿਕ ਤੇ ਸਰੀਰਕ ਤਸੱਦਦ ਕਰਨ ਦੀ ਜਿਥੇ ਸਖਤ ਸ਼ਬਦਾਂ ਵਿਚ ਨਿੰਦਾ ਕਰਦੇ ਹਾਂ, ਉਥੇ ਉਨ੍ਹਾਂ ਨੂੰ ਫੋਰੀ ਰਿਹਾਅ ਕਰਕੇ ਆਪਣੀ ਜਨਮ ਭੂਮੀ ਪੰਜਾਬ ਤੇ ਆਪਣੇ ਪਰਿਵਾਰ ਵਿਚ ਆਉਣ ਦੇਣ ਦੀ ਕਾਨੂੰਨੀ ਤੇ ਇਖਲਾਕੀ ਮੰਗ ਕਰਦੇ ਹਾਂ । ਜੇਕਰ ਹੁਕਮਰਾਨਾ ਨੇ ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਦੀ ਇਸ ਸੰਜੀਦਾ ਮੰਗ ਤੇ ਅਮਲ ਨਾ ਕੀਤਾ ਤਾਂ ਅਸੀ ਇਸ ਜਲਾਲਤ ਭਰੀ ਕਾਰਵਾਈ ਵਿਰੁੱਧ ਅਤੇ ਬਾਹਰਲੇ ਮੁਲਕਾਂ ਵਿਚ ਸਿੱਖਾਂ ਨੂੰ ਬਿਨ੍ਹਾਂ ਵਜਹ ਕਤਲ ਕਰਨ ਵਿਰੁੱਧ ਕੌਮਾਂਤਰੀ ਪੱਧਰ ਤੇ ਲੋਕ ਰਾਏ ਲਾਮਬੰਦ ਕਰਨ ਅਤੇ ਕੌਮਾਂਤਰੀ ਪੱਧਰ ਦਾ ਸੰਘਰਸ ਕਰਨ ਤੋ ਪਿੱਛੇ ਨਹੀ ਹੱਟਾਂਗੇ । ਜਿਸ ਲਈ ਇੰਡੀਅਨ ਹੁਕਮਰਾਨਾਂ ਨੂੰ ਆਖਿਰ ਮੂੰਹ ਦੀ ਖਾਣੀ ਪਵੇਗੀ । ਸੱਚ ਅਤੇ ਇਨਸਾਫ ਦੀ ਜਿੱਤ ਹੋ ਕੇ ਰਹੇਗੀ ।