ਬਾਦਲ ਦਲ ਵੱਲੋਂ ਕੌਮ ਪ੍ਰਤੀ ਕੀਤੀਆ ਬਜਰ ਗੁਸਤਾਖੀਆਂ ਅਤੇ ਗੈਰ-ਜਿੰਮੇਵਰਾਨਾਂ ਅਮਲਾਂ ਦੀ ਬਦੌਲਤ ਹੀ ਪਾਰਟੀ ਦੋਫਾੜ ਹੋਈ : ਮਾਨ

ਫ਼ਤਹਿਗੜ੍ਹ ਸਾਹਿਬ, 26 ਜੂਨ ( ) “ਅਕਾਲੀ ਦਲ ਬਾਦਲ ਪਾਰਟੀ ਜੋ ਅੱਜ ਦੋ ਗਰੁੱਪਾਂ ਵਿਚ ਵੰਡੀ ਗਈ ਹੈ, ਉਸ ਪਿੱਛੇ ਪ੍ਰਤੱਖ ਕਾਰਨ ਇਹ ਹਨ ਕਿ ਇਨ੍ਹਾਂ ਨੇ ਮੁਤੱਸਵੀ ਹਿੰਦੂਤਵ ਬੀਜੇਪੀ ਪਾਰਟੀ ਦਾ ਗੁਲਾਮ ਬਣਕੇ 1996 ਵਿਚ ਮੋਗਾ ਵਿਖੇ ਅਕਾਲੀ ਦਲ ਦੀ 75ਵੀ ਵਰ੍ਹੇਗੰਢ ਮਨਾਉਦੇ ਹੋਏ ਕੀਤੇ ਗਏ ਮੋਗਾ ਇਕੱਠ ਵਿਚ ਪਾਰਟੀ ਦੀ ਪੰਥਕ ਅਤੇ ਪੰਜਾਬ ਪ੍ਰਤੀ ਦਿੱਖ ਨੂੰ ਖਤਮ ਕਰਕੇ, ਆਪਣੇ ਭਾਈਵਾਲ ਮੁਤੱਸਵੀ ਜਮਾਤ ਬੀਜੇਪੀ ਨੂੰ ਖੁਸ ਕਰਨ ਲਈ ਪੰਜਾਬੀ ਪਾਰਟੀ ਦੇ ਤੌਰ ਤੇ ਨਵੀ ਪੰਥ ਵਿਰੋਧੀ ਪਹਿਚਾਣ ਦੇ ਦਿੱਤੀ । ਉਸ ਉਪਰੰਤ ਇਹ ਅਕਾਲੀ ਦਲ ਬਾਦਲ ਆਪਣੀ ਪੰਥਕ ਸਿਧਾਤਾਂ, ਸੋਚ ਤੋ ਦਿਨ-ਬ-ਦਿਨ ਨਿਘਾਰ ਵੱਲ ਜਾਂਦਾ ਰਿਹਾ ਅਤੇ ਅੱਜ ਪੰਜਾਬੀਆਂ ਤੇ ਖਾਲਸਾ ਪੰਥ ਦੇ ਮਨਾਂ ਤੇ ਆਤਮਾਵਾ ਵਿਚ ਬਿਲਕੁਲ ਮਨਫੀ ਹੋ ਕੇ ਰਹਿ ਗਿਆ ਹੈ ਅਤੇ ਸਿਆਸੀ ਖੇਤਰ ਵਿਚ ਹਾਸੀਏ ਤੇ ਪਹੁੰਚ ਚੁੱਕਾ ਹੈ । ਉਪਰੰਤ ਬੀਜੇਪੀ ਦੀ ਫਿਰਕੂ ਸੋਚ ਨੂੰ ਪੂਰਨ ਕਰਦੇ ਹੋਏ ਸ. ਪ੍ਰਕਾਸ਼ ਸਿੰਘ ਬਾਦਲ ਅਤੇ ਬਾਦਲ ਪਰਿਵਾਰ ਨੇ ਨਿਰੰਤਰ ਅਜਿਹੀਆ ਅਨੇਕਾ ਗੁਸਤਾਖੀਆ ਕੀਤੀਆ ਜਿਸ ਨਾਲ ਇਹ ਪਾਰਟੀ ਸਿੱਖ ਕੌਮ ਤੇ ਪੰਜਾਬੀਆਂ ਦੀ ਨੁਮਾਇੰਦਗੀ ਕਰਨ ਦੀ ਬਜਾਇ ਇਕ ਬਾਦਲ ਪਰਿਵਾਰ ਵਿਚ ਸੀਮਤ ਹੋ ਕੇ ਰਹਿ ਗਈ । ਹਰ ਤਰ੍ਹਾਂ ਦੇ ਪੰਥਕ, ਪੰਜਾਬ ਪ੍ਰਤੀ ਗੰਭੀਰ ਮੁੱਦਿਆ ਤੋ ਮੂੰਹ ਮੋੜਨ ਦੀ ਬਦੌਲਤ ਇਹ ਸਿਆਸੀ ਜਮਾਤ ਦਾ ਸਤਿਕਾਰ ਮਾਣ ਮਨਫੀ ਹੋ ਕੇ ਰਹਿ ਗਿਆ । ਇਹੀ ਵਜਹ ਹੈ ਕਿ ਅੱਜ ਇਸ ਪੰਜਾਬ ਦੀ ਸਿਆਸੀ ਜਮਾਤ ਦੋਫਾੜ ਹੋ ਕੇ ਸਾਹਮਣੇ ਆਈ ਹੈ । ਜਦੋ ਤੱਕ ਇਸ ਵਿਚ ਵਿਚਰਣ ਵਾਲੇ ਆਗੂ ਖਾਲਸਾ ਪੰਥ ਦੀ ਅਗਵਾਈ ਕਰਨ ਵਾਲੀ ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਦੀਆਂ ਨੀਤੀਆ ਅਤੇ ਸੋਚ ਉਤੇ ਪਹਿਰਾ ਦੇਣ ਦੇ ਅਮਲ ਨਹੀ ਕਰਦੇ, ਉਸ ਸਮੇ ਤੱਕ ਇਹ ਜਮਾਤ ਅਤੇ ਇਸ ਜਮਾਤ ਵਿਚਲੀ ਪੰਜਾਬੀਆਂ ਅਤੇ ਸਿੱਖ ਕੌਮ ਵੱਲੋ ਦੁਰਕਾਰੀ ਗਈ ਲੀਡਰਸਿਪ ਆਪਣੇ ਆਪ ਨੂੰ ਕਦਾਚਿੱਤ ਪੰਜਾਬੀਆਂ ਤੇ ਸਿੱਖ ਕੌਮ ਵਿਚ ਜੀਵਤ ਨਹੀ ਰੱਖ ਸਕੇਗੀ ਅਤੇ ਨਾ ਹੀ ਆਪਣੇ ਖਤਮ ਹੋ ਚੁੱਕੇ ਵਿਸਵਾਸ ਨੂੰ ਫਿਰ ਤੋ ਪ੍ਰਾਪਤ ਕਰ ਸਕੇਗੀ ।”

ਇਹ ਵਿਚਾਰ ਸ. ਸਿਮਰਨਜੀਤ ਸਿੰਘ ਮਾਨ ਪ੍ਰਧਾਨ ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਨੇ ਅਕਾਲੀ ਦਲ ਬਾਦਲ ਦੀ ਸਿਆਸੀ ਜਮਾਤ ਦੇ ਦੋਫਾੜ ਹੋਣ ਉਤੇ ਨਿਰੰਤਰ ਲੰਮੇ ਸਮੇ ਤੋ ਪੰਥਕ ਸੋਚ ਅਤੇ ਮੁੱਦਿਆ ਨੂੰ ਪਿੱਠ ਦੇਣ, ਇਸਨੂੰ ਪੰਜਾਬੀ ਪਾਰਟੀ ਬਣਾਉਣ ਅਤੇ ਮੁਤੱਸਵੀ ਫਿਰਕੂ ਬੀਜੇਪੀ ਤੇ ਆਰ.ਐਸ.ਐਸ. ਵਰਗੀ ਜਮਾਤ ਦੇ ਗੁਲਾਮ ਬਣਕੇ ਵਿਚਰਣ ਨੂੰ ਇਸ ਹੋਈ ਦੋਫਾੜ ਲਈ ਜਿੰਮੇਵਾਰ ਠਹਿਰਾਉਦੇ ਹੋਏ, ਬਿਨ੍ਹਾਂ ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਦੀ ਕੌਮੀ ਪਾਲਸੀ ਨੂੰ ਪ੍ਰਵਾਨ ਕਰਨ ਤੋ ਆਪਣੇ ਲੋਕਾਂ ਵਿਚ ਫਿਰ ਤੋ ਜੀਵਤ ਹੋਣ ਲਈ ਹੋਰ ਕੋਈ ਰਾਹ ਨਾ ਹੋਣ ਦੀ ਗੱਲ ਕਰਦੇ ਹੋਏ ਪ੍ਰਗਟ ਕੀਤੇ । ਉਨ੍ਹਾਂ ਕਿਹਾ ਕਿ ਜਦੋ ਸਾਹਿਬ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀਆਂ ਪੰਜਾਬ ਵਿਚ ਬੇਅਦਬੀਆ ਹੋਈਆ ਅਤੇ ਸਿੱਖ ਕੌਮ ਤੇ ਸਿੱਖ ਲੀਡਰਸਿਪ ਨੇ ਬਰਗਾੜੀ ਬਹਿਬਲ ਕਲਾਂ ਵਿਖੇ ਦੋਸ਼ੀਆਂ ਨੂੰ ਗ੍ਰਿਫਤਾਰ ਕਰਨ ਲਈ ਸ਼ਾਂਤਮਈ ਧਰਨੇ ਦਿੱਤੇ ਤਾਂ ਬਾਦਲ ਦਲ ਦੀ ਉਸ ਸਮੇ ਪੰਜਾਬ ਸਰਕਾਰ ਦੇ ਡੀਜੀਪੀ ਸੁਮੇਧ ਸੈਣੀ ਅਤੇ ਪੁਲਿਸ ਵੱਲੋ ਸ਼ਾਂਤਮਈ ਧਰਨੇ ਉਤੇ ਗੋਲੀ ਚਲਾਕੇ ਦੋ ਸਿੱਖਾਂ ਕ੍ਰਿਸ਼ਨ ਭਗਵਾਨ ਸਿੰਘ ਅਤੇ ਗੁਰਜੀਤ ਸਿੰਘ ਨੂੰ ਸ਼ਹੀਦ ਕਰਨ, ਕੋਟਕਪੂਰਾ, ਬੁਰਜ ਜਵਾਹਰ ਸਿੰਘ ਵਿਖੇ ਹੋਏ ਉਪੱਦਰਾਂ ਲਈ ਸਿੱਖ ਕੌਮ ਨੂੰ ਕੋਈ ਇਨਸਾਫ਼ ਨਾ ਦੇਣ ਦੀ ਬਦੌਲਤ ਉਸ ਸਮੇ ਹੀ ਇਹ ਬਾਦਲ ਦਲ ਪੰਜਾਬੀਆਂ ਤੇ ਸਿੱਖ ਕੌਮ ਦੇ ਮਨਾਂ ਵਿਚ ਤੇਜ਼ੀ ਨਾਲ ਮਨਫੀ ਹੋਣਾ ਸੁਰੂ ਹੋ ਗਿਆ ਸੀ । ਫਿਰ ਸਾਜਸੀ ਢੰਗ ਨਾਲ ਇਨ੍ਹਾਂ ਅਧੀਨ ਚੱਲ ਰਹੇ ਪ੍ਰਬੰਧ ਵਾਲੀ ਐਸ.ਜੀ.ਪੀ.ਸੀ ਦੇ ਅਧਿਕਾਰੀਆ ਦੀ ਮਿਲੀਭੁਗਤ ਰਾਹੀ 328 ਪਾਵਨ ਸਰੂਪ ਲਾਪਤਾ ਹੋਣੇ, ਸਿਰਸੇਵਾਲੇ ਸੌਦਾ ਸਾਧ ਜਿਸਨੇ ਗੁਰੂ ਗੋਬਿੰਦ ਸਿੰਘ ਜੀ ਦਾ ਸਵਾਂਗ ਰਚਾਉਣ ਦੀ ਗੁਸਤਾਖੀ ਕੀਤੀ, ਉਸ ਨੂੰ ਕੌਮੀ ਲੀਹਾਂ ਅਤੇ ਰਵਾਇਤਾ ਅਨੁਸਾਰ ਸ੍ਰੀ ਅਕਾਲ ਤਖ਼ਤ ਸਾਹਿਬ ਵੱਲੋ ਸਜ਼ਾ ਦੇਣ ਦੀ ਬਜਾਇ ਉਸਨੂੰ ਮੁਆਫ ਕਰਵਾਉਣ ਦੀ ਬਜਰ ਗੁਸਤਾਖੀ, ਭਾਈ ਗੁਰਦੇਵ ਸਿੰਘ ਕਾਊਕੇ ਦੀ ਸ਼ਹਾਦਤ ਦੀ ਪੜਚੋਲ ਕਰਨ ਵਾਲੀ ਤਿਵਾੜੀ ਰਿਪੋਰਟ ਅਨੁਸਾਰ ਅਮਲ ਕਰਕੇ ਦੋਸ਼ੀਆਂ ਨੂੰ ਸਜ਼ਾਵਾਂ ਨਾ ਦੇਣ, ਬਲਿਊ ਸਟਾਰ ਦੇ ਫ਼ੌਜੀ ਹਮਲੇ ਲਈ ਮਰਹੂਮ ਇੰਦਰਾ ਗਾਂਧੀ ਨੂੰ ਸਹਿਮਤੀ ਦੇਣ, ਸਿੱਖ ਨੌਜਵਾਨੀ ਨੂੰ ਝੂਠੇ ਪੁਲਿਸ ਮੁਕਾਬਲਿਆ ਵਿਚ ਮਾਰਨ ਵਾਲੀ ਕਾਤਲ ਪੁਲਿਸ ਅਫਸਰਸਾਹੀ ਨੂੰ ਬਾਦਲ ਪਰਿਵਾਰ ਵੱਲੋ ਤਰੱਕੀਆ ਦੇਣ, ਆਪਣੀਆ ਪੰਜਾਬ ਦੀਆਂ ਹਕੂਮਤਾਂ ਸਮੇ ਸਜਾਵਾਂ ਪੂਰੀਆ ਕਰ ਚੁੱਕੇ ਸਿੱਖ ਬੰਦੀਆਂ ਦੀ ਰਿਹਾਈ ਲਈ ਕੋਈ ਵੀ ਸੰਜੀਦਗੀ ਭਰਿਆ ਅਮਲ ਨਾ ਕਰਨ, ਆਪਣੇ ਸਵਾਰਥੀ ਹਿੱਤਾ ਦੀ ਪੂਰਤੀ ਲਈ ਸਿੱਖ ਕੌਮ ਦੀ ਪਾਰਲੀਮੈਟ ਐਸ.ਜੀ.ਪੀ.ਸੀ ਦੀਆਂ ਜਰਨਲ ਚੋਣਾਂ ਮੁਤੱਸਵੀ ਹੁਕਮਰਾਨਾਂ ਨਾਲ ਰਲਕੇ 14 ਸਾਲਾਂ ਤੋ ਨਾ ਹੋਣ ਦੇਣ, ਪੰਜਾਬ ਦੇ ਕੀਮਤੀ ਪਾਣੀਆਂ ਨੂੰ ਆਪਣੇ ਨਿੱਜੀ ਹਿੱਤਾ ਲਈ ਦੂਸਰੇ ਸੂਬਿਆਂ ਅਤੇ ਸੈਟਰ ਨੂੰ ਦੇਣ, ਇਥੋ ਦੀ ਪੈਦਾ ਹੋਣ ਵਾਲੀ ਬਿਜਲੀ ਦੂਸਰੇ ਸੂਬਿਆਂ ਨੂੰ ਦੇਣ, ਪੰਜਾਬੀ ਬੋਲੀ ਨਾਲ ਨਿਰੰਤਰ ਇਨ੍ਹਾਂ ਵੱਲੋ ਬੇਇਨਸਾਫ਼ੀ ਕਰਦੇ ਰਹਿਣ, ਚੰਡੀਗੜ੍ਹ ਅਤੇ ਹੋਰ ਪੰਜਾਬੀ ਬੋਲਦੇ ਇਲਾਕਿਆ ਨੂੰ ਪੰਜਾਬ ਵਿਚ ਸਾਮਿਲ ਕਰਨ ਲਈ ਕੋਈ ਸੁਹਿਰਦ ਯਤਨ ਨਾ ਕਰਨ ਅਤੇ ਸੈਟਰ ਦੀਆਂ ਹਕੂਮਤਾਂ ਦੇ ਜ਼ਬਰ ਜੁਲਮਾਂ ਅੱਗੇ ਹਰ ਵਾਰੀ ਗੋਡੇ ਟੇਕ ਕੇ ਪੰਜਾਬ ਸੂਬੇ ਤੇ ਪੰਜਾਬੀਆਂ ਦੀ ਲੁਟਾਈ ਕਰਵਾਉਣ ਦੇ ਅਤਿ ਗੰਭੀਰ ਕਾਰਨ ਹਨ । 

ਇਸ ਤੋ ਇਲਾਵਾ ਜੋ ਸਿੱਖ ਕੌਮ ਦੇ ਮਨਾਂ ਤੇ ਆਤਮਾਵਾ ਨੂੰ ਬਹੁਤ ਡੂੰਘੀ ਠੇਸ ਪਹੁੰਚਾਉਣ ਵਾਲੀ ਕਾਰਵਾਈ ਹੈ ਕਿ ਜਦੋ ਇੰਡੀਆ ਦੀ ਮੁਤੱਸਵੀ ਬੀਜੇਪੀ-ਆਰ.ਐਸ.ਐਸ ਹਕੂਮਤ ਨੇ ਇੰਡੀਆ ਵਿਚ ਅਤੇ ਬਾਹਰਲੇ ਮੁਲਕਾਂ ਵਿਚ ਆਜਾਦੀ ਦੀ ਗੱਲ ਕਰਨ ਵਾਲੇ ਸਿੱਖਾਂ ਨੂੰ ਆਪਣੀਆ ਏਜੰਸੀਆਂ ਆਈ.ਬੀ, ਰਾਅ, ਮਿਲਟਰੀ ਇੰਨਟੈਲੀਜੈਸ, ਗ੍ਰਹਿ ਵਜੀਰ ਅਮਿਤ ਸ਼ਾਹ, ਰੱਖਿਆ ਵਜੀਰ ਰਾਜਨਾਥ ਸਿੰਘ, ਵਿਦੇਸ ਵਜੀਰ ਜੈਸੰਕਰ, ਸੁਰੱਖਿਆ ਸਲਾਹਕਾਰ ਅਜੀਤ ਡੋਵਾਲ, ਰਾਅ ਦੇ ਮੌਜੂਦਾ ਮੁੱਖੀ ਰਵੀ ਸਿਨ੍ਹਾ ਅਤੇ ਰਾਅ ਦੇ ਸਾਬਕਾ ਮੁੱਖੀ ਸੰਮਤ ਗੋਇਲ ਵੱਲੋ ਸਾਂਝੇ ਤੌਰ ਤੇ ਸਿੱਖਾਂ ਨੂੰ ਕਤਲ ਕਰਵਾਉਣ ਦੀ ਪਾਲਸੀ ਬਣਾਈ ਹੈ । ਜਿਸਦਾ ਇਨ੍ਹਾਂ ਵੱਲੋ ਬਤੌਰ ਸਿੱਖਾਂ ਦੀ ਜਮਾਤ ਹੋਣ ਦੇ ਨਾਤੇ ਵਿਰੋਧ ਕਰਨਾ ਤੇ ਇਸ ਵਿਰੁੱਧ ਸੰਘਰਸ ਕਰਨਾ ਬਣਦਾ ਸੀ, ਇਨ੍ਹਾਂ, ਐਸ.ਜੀ.ਪੀ.ਸੀ ਨੇ ਸ੍ਰੀ ਅਕਾਲ ਤਖ਼ਤ ਸਾਹਿਬ ਵੱਲੋ ਕੋਈ ਅਮਲ ਨਾ ਹੋਣਾ ਇਨ੍ਹਾਂ ਦੀ ਸਾਖ ਨੂੰ ਸਿੱਖ ਕੌਮ ਵਿਚੋ ਖਤਮ ਕਰਨ ਹੋਣ ਵਾਲੀਆ ਆਪਹੁਦਰੀਆ ਕਾਰਵਾਈਆ ਸਨ । ਜਦੋ ਫਾਈਵ ਆਈ ਮੁਲਕਾਂ ਅਮਰੀਕਾ, ਕੈਨੇਡਾ, ਬਰਤਾਨੀਆ, ਆਸਟ੍ਰੇਲੀਆ ਅਤੇ ਨਿਊਜੀਲੈਡ ਵੱਲੋ ਇਸ ਸਿੱਖਾਂ ਨੂੰ ਮਾਰਨ ਦੀ ਪਾਲਸੀ ਦਾ ਜ਼ਬਰਦਸਤ ਵਿਰੋਧ ਹੋ ਰਿਹਾ ਹੈ, ਤਾਂ ਸਮੁੱਚੀ ਵਿਰੋਧੀ ਪਾਰਟੀਆ ਅਤੇ ਬਾਦਲ ਦਲੀਆ ਵੱਲੋ ਇਸ ਵਿਸੇ ਤੇ ਚੁੱਪੀ ਰੱਖਣਾ ਤਾਂ ਉਸ ਜ਼ਬਰ ਵਾਲੀ ਪਾਲਸੀ ਨਾਲ ਸਹਿਮਤੀ ਨੂੰ ਹੀ ਜਾਹਰ ਕਰਦੀ ਹੈ ।

ਉਨ੍ਹਾਂ ਕਿਹਾ ਕਿ ਜਦੋ ਅਮਰੀਕਾ ਨੇ ਸ. ਗੁਰਪਤਵੰਤ ਸਿੰਘ ਪੰਨੂ ਦੇ ਕਤਲ ਕੇਸ ਦੀ ਸਾਜਿਸ ਵਿਚ ਫ਼ੌਜਦਾਰੀ ਕੇਸ ਦਰਜ ਕਰ ਲਿਆ ਤਾਂ ਸਿੱਖਾਂ ਨੂੰ ਕਤਲ ਕਰਨ ਵਾਲੇ ਇੰਡੀਅਨ ਹੁਕਮਰਾਨਾਂ ਅਤੇ ਰਾਅ ਵਰਗੀਆ ਏਜੰਸੀਆ ਵੱਲੋ ਕਿਹਾ ਜਾ ਰਿਹਾ ਹੈ ਕਿ ਆਜਾਦੀ ਚਾਹੁੰਣ ਵਾਲੇ ਸਿੱਖਾਂ ਦੇ ਕਤਲ ਤਾਂ (rogue) ਬਦਮਾਸਾਂ ਵੱਲੋ ਕੀਤੇ ਜਾ ਰਹੇ ਹਨ । ਫਿਰ ਤਾਂ ਜੇ ਹਿਟਲਰ ਬਦਮਾਸ ਸੀ, ਇਟਲੀ ਵਿਚ ਮੋਸੋਲੀਨੀ ਬਦਮਾਸ ਸੀ ਅਤੇ ਜਪਾਨ ਦਾ ਤੋਜੋ ਬਦਮਾਸ ਸੀ, ਫਿਰ ਤਾਂ ਵਾਰ ਕ੍ਰਾਈਮ ਦੀਆਂ ਨਿਊਰਮਬਰਗ ਅਤੇ ਟੋਕੀਓ ਟਰਾਈਲ ਨਾ ਹੁੰਦੀਆ । ਉਨ੍ਹਾਂ ਕਿਹਾ ਜੇਕਰ ਇਨ੍ਹਾਂ ਅਨੁਸਾਰ ਇੰਡੀਆ ਨੂੰ ਰੋਗ ਬਦਮਾਸ ਚਲਾ ਰਹੇ ਹਨ ਜਿਨ੍ਹਾਂ ਨੇ 2002 ਵਿਚ ਗੁਜਰਾਤ ਵਿਚ ਮੁਸਲਮਾਨਾਂ ਦਾ ਕਤਲੇਆਮ ਕੀਤਾ ਅਤੇ ਮੁਸਲਿਮ ਬੀਬੀਆ ਦੀਆਂ ਨਗਨ ਵੀਡੀਓਜ ਬਣਾਈਆ । 2013 ਵਿਚ ਗੁਜਰਾਤ ਵਿਚ ਸ੍ਰੀ ਮੋਦੀ ਨੇ ਮੁੱਖ ਮੰਤਰੀ ਹੁੰਦੇ ਹੋਏ 60 ਹਜਾਰ ਉਨ੍ਹਾਂ ਸਿੱਖਾਂ ਜੋ ਆਪਣੀਆ ਜਮੀਨਾਂ ਅਤੇ ਜਾਇਦਾਦਾਂ ਦੇ ਮਾਲਕ ਸਨ ਉਨ੍ਹਾਂ ਨੂੰ ਬੇਘਰ ਤੇ ਬੇਜਮੀਨੇ ਕਰ ਦਿੱਤਾ । ਫਿਰ 2019 ਵਿਚ ਗੈਰ ਵਿਧਾਨਿਕ ਢੰਗ ਰਾਹੀ ਕਸਮੀਰੀਆ ਦੀ ਖੁਦਮੁਖਤਿਆਰੀ ਤੋੜ ਦਿੱਤੀ, ਉਨ੍ਹਾਂ ਦੀ ਅਸੈਬਲੀ ਭੰਗ ਕਰ ਦਿੱਤੀ, ਉਥੇ ਫ਼ੌਜੀ ਰਾਜ ਲਗਾ ਦਿੱਤਾ । ਫਿਰ ਇਹ ਸਾਰੀਆ ਕਾਰਵਾਈਆ ਗੈਰ ਵਿਧਾਨਿਕ, ਗੈਰ ਸਮਾਜਿਕ ਅਤੇ ਬਦਮਾਸੀ ਵਾਲੀਆ ਹੀ ਹਨ । ਜਿਨ੍ਹਾਂ ਨੂੰ ਇਹ ਬਾਦਲ ਦਲੀਏ ਸੈਟਰ ਤੇ ਪੰਜਾਬ ਵਿਚ ਨਿਰੰਤਰ ਸਾਥ ਦਿੰਦੇ ਰਹੇ ਅਤੇ ਉਨ੍ਹਾਂ ਦੇ ਪੰਜਾਬੀਆਂ ਤੇ ਸਿੱਖ ਕੌਮ ਉਤੇ ਕੀਤੇ ਜਾਣ ਵਾਲੇ ਜ਼ਬਰ ਜੁਲਮਾਂ ਲਈ ਪਿੱਠ ਥਾਪੜਨ ਵਾਲੇ ਵੀ ਬਾਦਲ ਪਰਿਵਾਰ ਅਤੇ ਮੌਜੂਦਾ ਬਾਦਲ ਦਲੀਏ ਹੀ ਹਨ । ਜੋ ਅੱਜ ਤੱਕ ਉਨ੍ਹਾਂ ਦੇ ਹਰ ਗੈਰ ਇਨਸਾਨੀ ਅਤੇ ਗੈਰ ਵਿਧਾਨਿਕ ਕੰਮਾਂ ਵਿਚ ਸਾਥ ਦਿੰਦੇ ਰਹੇ ਹਨ । ਫਿਰ ਇਨ੍ਹਾਂ ਨੇ ਕੋਈ ਵੀ ਮੁੱਦਾ ਪੰਜਾਬ ਤੇ ਸਿੱਖ ਕੌਮ ਸੰਬੰਧੀ ਪਾਰਲੀਮੈਟ ਵਿਚ ਕਦੀ ਨਹੀ ਉਠਾਇਆ ਜਦੋਕਿ ਮੈਂ ਪਹਿਲਾ 05 ਫਰਵਰੀ 2024 ਅਤੇ ਫਿਰ 09 ਫਰਵਰੀ 2024 ਨੂੰ ਬਾਦਲੀਲ ਢੰਗ ਨਾਲ ਇਹ ਸਾਰੇ ਮੁੱਦੇ ਉਠਾਕੇ ਪੰਜਾਬੀਆਂ ਤੇ ਸਿੱਖ ਕੌਮ ਦੀ ਆਵਾਜ ਬੁਲੰਦ ਕਰਨ ਦੇ ਆਪਣੇ ਫਰਜ ਪੂਰੇ ਕਰਦਾ ਰਿਹਾ ਹਾਂ । ਇਸ ਲਈ ਹੁਣ ਜਦੋ ਤੱਕ ਇਹ ਪੰਜਾਬੀਆਂ ਤੇ ਸਿੱਖ ਕੌਮ ਵੱਲੋ ਹਰ ਖੇਤਰ ਵਿਚ ਦੁਰਕਾਰੇ ਜਾ ਚੁੱਕੇ ਬਾਦਲ ਦਲੀਆ ਵੱਲੋ ਸਾਡੇ ਕੌਮੀ ਏਜੰਡੇ ਨੂੰ ਪ੍ਰਵਾਨ ਕਰਕੇ ਸਮੂਹਿਕ ਰੂਪ ਵਿਚ ਕੌਮੀ ਸੰਘਰਸ ਨੂੰ ਸਮਰਪਿਤ ਹੁੰਦੇ ਹੋਏ ਆਪਣੀਆ ਕਾਰਵਾਈਆ ਪੰਜਾਬ ਤੇ ਸਿੱਖ ਕੌਮ ਪੱਖੀ ਕਰਨ ਵਿਚ ਯੋਗਦਾਨ ਨਹੀ ਪਾਉਦੇ, ਜੋ ਦਿਹਾੜੇ ਸੰਤ ਜਰਨੈਲ ਸਿੰਘ ਭਿੰਡਰਾਂਵਾਲਿਆ ਦਾ ਜਨਮ ਦਿਨ, 06 ਜੂਨ ਦੇ ਘੱਲੂਘਾਰੇ ਦਿਹਾੜੇ, 21 ਜੂਨ ਨੂੰ ਗੱਤਕਾ ਦਿਹਾੜੇ ਵਿਚ ਸਮੂਲੀਅਤ ਨਹੀ ਕਰਦੇ, ਕੁਰਸੀ ਅਤੇ ਹਿੰਦੂਤਵ ਗੁਲਾਮੀ ਦਾ ਭੈ ਛੱਡ ਨਹੀ ਦਿੰਦੇ, ਉਸ ਸਮੇ ਤੱਕ ਇਹ ਪੰਜਾਬੀਆਂ ਤੇ ਸਿੱਖ ਕੌਮ ਦੀ ਅਦਾਲਤ ਵਿਚ ਨਾ ਤਾਂ ਪੇਸ ਹੋਣ ਦੇ ਸਮਰੱਥ ਹੋ ਸਕਦੇ ਹਨ ਅਤੇ ਨਾ ਹੀ ਸਿਆਸੀ ਖੇਤਰ ਵਿਚ ਜੀਵਤ ਹੋ ਸਕਦੇ ਹਨ । ਇਸ ਲਈ ਇਨ੍ਹਾਂ ਦੋਫਾੜ ਹੋਏ ਇਖਲਾਕ ਅਤੇ ਸਿਆਸੀ ਕਦਰਾਂ ਕੀਮਤਾਂ ਤੋ ਗਿਰ ਚੁੱਕੇ ਇਨ੍ਹਾਂ ਆਗੂਆਂ ਨੂੰ ਸਾਡੀ ਨੇਕ ਸਲਾਹ ਹੈ ਕਿ ਜੇਕਰ ਇਨ੍ਹਾਂ ਨੇ ਆਪਣੀ ਆਖਰੀ ਉਮਰ ਵਿਚ ਆਤਮਿਕ ਅਤੇ ਅਣਖ ਤੌਰ ਤੇ ਜੀਣਾ ਹੈ, ਇਥੋ ਸਨਮਾਨ ਪ੍ਰਾਪਤ ਕਰਕੇ ਜਾਣਾ ਹੈ, ਤਾਂ ਫਿਰ ਉਹ ਆਪਣੀਆ ਅਤੇ ਆਪਣੇ ਅਕਾਵਾਂ ਦੁਆਰਾ ਹੋਈਆ ਬਜਰ ਗੁਸਤਾਖੀਆ ਦਾ ਆਤਮਿਕ ਤੌਰ ਤੇ ਪਛਤਾਵਾ ਕਰਕੇ ਖਾਲਸਾ ਪੰਥ ਦੀ ਆਜਾਦੀ ਦੇ ਚੱਲ ਰਹੇ ਮਿਸਨ ਅਤੇ ਹੁਕਮਰਾਨਾਂ ਵੱਲੋ ਸਿੱਖਾਂ ਨੂੰ ਮਾਰਨ ਦੀ ਪਾਲਸੀ ਦਾ ਡੱਟਕੇ ਵਿਰੋਧ ਕਰਦੇ ਹੋਏ ਸਾਡੇ ਏਜੰਡੇ ਤੇ ਆਉਣ, ਫਿਰ ਹੀ ਉਹ ਉਸ ਅਕਾਲ ਪੁਰਖ ਦੀ ਦਰਗਾਹ ਵਿਚ ਆਪਣੇ ਆਪ ਨੂੰ ਪੇਸ ਕਰਨ ਦੇ ਕਾਬਲ ਹੋ ਸਕਣਗੇ । ਵਰਨਾ ਉਨ੍ਹਾਂ ਦੀਆਂ ਆਤਮਾਵਾ ਰੋਦੀਆ ਕੁਰਲਾਉਦੀਆ ਇਸ ਦੁਨੀਆ ਤੋ ਕੂਚ ਕਰਨਗੀਆਂ ।